Genesis 18
Ta Mitema Tatalu Mixali Noxou Avalaamu
1Xe ili'i la, no voxo vile la IAUE muxali mupala'a noxou Avalaamu no ovu tavuna ilemolu lexe Mamule. No voxo ane ne la, aso ialuxu misevile la sou Avalaamu muatu muxolu no aitenga sou taasou. 2 aXe mumalei mutelo loxo 'o la mumaisi'a ta mitema tatalu a itutulu, xe muavuti la muiave mulai noxi'a sou mualaxa'a. Muxali noxi'a la mutangatulu mulu'elai sou mutoxone'i 3la sou muvikalane'i aloxo 'o, “Ta tatila, lexe ngingi opongengi usexelaxo la mamu ngingi ngapolopepee tualasilo. 4Eni apalusou itema vile sou utau lexa mo une'e mo nga'uinu tavainge no anu mo ngane'e ngama'ila no maimaixu ovu 'o. 5Eni ano'ungenge la'ilali sevile une'e sou ulosinge xavi sou ngingi ngasolo muamua'i noxinge. Laixe musuku xo ngingi ngene'e noxilo.” Ane'i ilo'a mikolinu vaikalau aloxo 'o, “Laixe musuku noxine, nexi oponexi mu'osasou 'ilixo laixe ane ne.”6Muvikalane'i ilo'a aloxo ne mukalu la muiave mulai no taasou la muvikalane Sala aloxo 'o, “Napalea nano'u palaua tivasou sene mo napuinu veleti se'i mo napalea naxaumusou ane alalae 'osi.” 7Xe muavuti la muiave mulai no taasi'a ta kau sou muno'u kau 'olu vile lailaixe ka muno'u mulai noxou itema sou xaixai noxou sou mupalepeinu ka muxutulalau. 8Muxutulalau mukalu la mu'ele'elexu sou muxutuxu. Muxutuxu mukalu la anu Avalaamu muno'u ilou susu lovoxu mo susu sou molu mulai mulosi'a no ovu tava'u e ixoxoo no anu sou mi'ou. Ane'i mi'ani'ani, ia Avalaamu ne mututulu sou muxoxoomaie'i no ovu tava'u 'alai noxi'a.
9Mi'ani mukalu la mitali'isou aloxo 'o, “Semameni Sala ane 'ava?” Anu muvikalane'i lexe, “Ane a ixoxoo no tani.” 10 bXe vile noxi'a muavuti la muvikala aloxo 'o, “Usoko vaimomo mo ulai utalo no anu so'io ano 'o no tauu ie alavua xe eni alivu alu'e manina la ane ivo'o 'ilie vile mulu manina.” Sala ne a itutulu ili'i no tumalou no aitengaxu taasi'a mo ane a ilolomu kalumo. 11Anu Avalaamu ilee semau ne ane'i ta aululu, mole semau ne ikukulukemele la ua. 12 cMole ane milomu aloxo ne la ane mikeke la mivikala aloxo 'o, “Vaimomo 'o ne, eni a aululu mo xavileli la ua, taleli u'osa mo umasaxau muluxeni loxovaa la? Xo anu kalumo ne anu aululu.”
13Xe ili'i la IAUE mutali'isou Avalaamu, “Tava'u loxovaa la Sala mikeke ka mivikala lexe umomomo sou ane ivo'onu keakea vile mine ane a aululu 'o? 14 dMii ma'ia ane pekia'u noxou IAUE? Anu aloxo eni elemolu ne, so'io ano 'o tauu ie alavua la eni alivu une'e, la Sala ivo'onu 'ilie vile mulu.” 15Tava'u xo Sala mi'ume, la ane misingi lexe ane ikeke uasi. Ia anu muvikala lexe, “Manina, nini nekekeiou vaikala ane ne.”
16Xe ili'i la ane'i ta mitema tatalu ne milai no xalee vile sou ilai itulu teitexi sou ie'i ulu'elai sou imaisou tuala ne Sodomu. Avalaamu mumuline'i sou musaxane'i milai. 17Xe IAUE muavuti la tanu muvikalanu aloxo 'o, “Mamu eni atalumeu mii e eni emasaxa lexe eni a'oxonu. 18Ta xasoxasou mo ta 'ilu'ilusunu ixali tavu'alo mo ane'i ta mitema sou xavi sou tuala. Vote'i ane noxou 'osi, la sou eni aalusi'a ta mitema iouiou no xalexalee tuatuala 'o ukalusi. 19Eni melosi esosovosou mo sou anu uulaxune'i ta 'olu ilo'a ta xasoxasou mo ta 'ilu'ilusunu mo sou ta mitema imuli masaxa noxou Lataua mo imuli 'ili'ilixo ane lailaixe mo ane manina. Lexe ane'i imulinu aloxo eni emasaxau ne, la eni mimii e epala'alixu noxou lexe eni a'oxonu ulai noxou ne, eni a'oxo ukalusi.”
20Ioxe, xe ili'i la, la IAUE muvikalanu Avalaamu aloxo 'o, “A'alo piena musuku eni elomusou lexe tuala tamei e Sodomu ilee Xomola ne mixali masua. Ta mitema sou tuala tamei ne, 'ili'ilixo masumasua noxi'a ne mu'oki'oki tani misevile. 21Eni alai mo ataxuu a'alo sou xoluxolu noxi'a ne mo alomu laixe lexe anu vaivaikala ane ne manina.”
22IAUE muvikala aloxo 'o ne mulai noxou Avalaamu mukalu, la sou ta mitema tamei e ilo'a mikei ne, ilou milutu sou milai loxo ne Sodomu, ia IAUE nesi, anu muxolu noxou Avalaamu. 23Xe Avalaamu muavuti la musuku mulai 'alai noxou IAUE la mutali'isou, “Loxovaa, maasi la nini nakalusi'a ta mitema ane milapu ilo'a ane'i ane ta masua ukalusi? 24Loxovaa, lexe ta mitema mavulovexa ta'uve ane milapu ixoo no nano no tuala tila ane ne, nini nakalusi'a kalumo mo ilo'a tualasi'a iulua ukalusi? Tanenixu tuala tila ne mo, uxolusi mo sou ta mitema mavulovexa ta'uve ne iulua uasi? 25Manina, eni elavu lexe nini umomomo sou nakalusou maulixa'a ane'i ane milapu ilo'a ane'i ane ta masumasua uasi. Anu ane ne, umomomo no anu xavutala uasi. Umomomo sou nini na'oxo loxo ne uasi. Anu ane ne masua. Laixe nini namulinu xavutala ane mulapusi, ka sou nini na'oxo aloxo nini nemasaxa lexe na'oxonu noxi'a ta mitema ukalusi.”
26Xe IAUE muavuti la mukolinu Avalaamu vaikalau aloxo 'o, “Lexe eni axalisi'a ta mitema mavulovexa ta'uve ane milapu no nano ne Sodomu ne, la eni akalusou tuala uasi, xo ane'i ta mitema milapu ane ne, ixoo no nano no tuala ne, ia iulua uasi.”
27Ioxe, Avalaamu muavuti la muvikala aloxo 'o la, “IAUE, mamu nini la'iaxeneilo sou vaikala ilou tali'i piepiena noxilo 'o. Xo eni itema vile vitanisi, eni amomomo sou avikalanenixu mii vile sou nini na'oxonu uasi. 28Ia lexe ta mitema mavulovexa ta'uve ane milapu uasi ixoo no tuala ne uasi, ia mavulovexa tami'a mo ta'uvesi a ixoo, la loxovaa nini nakalusou tuala ane nesi?” Xe IAUE muavuti la mukolinu tali'iiou Avalaamu aloxo 'o, “Lexe eni amaisi'a ta mitema mavulovexa tami'a mo ta'uve ane milapu, la eni akalusou tuala ne uasi.”
29Xe Avalaamu muavuti la mutali'i aloxo 'o la, “Lexe nini namaisi'a ta mitema mavulovexa tami'a ane milapu ixolu, la loxovaa noxi'a ane'i ane ne?” Anu IAUE mukolinu aloxo 'o, “Lexe eni amaisi'a aloxo nini nelemolu ne, la eni amomomo sou akalusou tuala ne uasi.”
30Xe Avalaamu muavuti la muvikalanu IAUE aloxo 'o la, “Mamu la'iaxenenilo, xo eni amasaxa lexe avivikala ulai noxine la. Ioxe, lexe itiitisi'a ulu'e loxo mavulovexa tatalusi la ane ne loxovaa?” La Lataua mukolinu lexe, “A lexe eni amaisi'a xe itiitisi'a muxali aloxo ne, la eni amomomo sou akalusi'a uasi.”
31Xe Avalaamu muavuti la muvikala aloxo 'o la, “IAUE, mamu la'iaxeneilo sou talitali'i ilou vaivaikala piepiena te a'oxo'oxonu une'e noxine 'o, xo eni amasaxa lexe atali'isine la. Ia lexe itiitisi'a ulu'e loxo itemaxu vile, la ane ne loxovaa noxine?” Anu muavuti la mukolinu tali'i noxou Avalaamu aloxo 'o, “A lexe itiitisi'a loxo itemaxu vile, la ane ne eni amomomo sou akalusou tuala tile ne uasi.”
32Xe Avalaamu muavuti la muvikala aloxo 'o la, “IAUE, mamu la'iaxene. Eni amasaxa lexe atali'i kaluxusou la. Lexe itiitisi'a ulu'elai loxo mavulovexa vile, la loxovaa no anu ane ne?” Anu mukolinu aloxo 'o, “Lexe eni amaisou lexe ta mitema mavulovexasi milapu a ixolu, la eni amomomo sou akalusou tuala tila ne uasi.”
33Ilou mivivikala aloxo ne mukalu la, IAUE mulai xe Avalaamu mulivu mulai no taasou.
Copyright information for
ATA